मैथिली गीत : बारहमासा (BARAHMASA)

चैत  हे  सखि  मोन  महमह  मजरल  नेहक  आम  हे
बैसाख चढ़िते  खसलै टिकुला  पिया नै  एला गाम हे

जेठ  हे सखि  उठलै  झरकी  प्यासल  हिया  मोर  हे
अखाढ़  मास  बरिसल  बूंदिया  भीजले  पोरे-पोर  हे

साओन हे सखि उझलए बदरा जागल मोनमे प्रीत हे
मास भादव  लागए अनमन   एसगर विरहके गीत हे

आसिन हे सखि   राति भीजल   दूभि शीत मलार हे
मास कातिक   देह सिहरल  शिशिर कएल  दुलार हे

अगहन हे सखि  पिया अओता   कटबै  संगे धान हे
पूस मास   अंगैठी केलक   जाड़  होइत  जुआन  हे

माघ हे सखि  धोन्हि पसरल  कांपए  थरथर  देह हे
फागुन अबिते   चढ़ले हिय पर  पिया  रंगक  नेह हे
◼️
✍️ अक्षय आनन्द सन्नी